رشا كمال إبراهيم
مصر
قصيدة عامية(كنت برضى)
كنت برضى بأى حاجة،كنت مش بطلب زيادة
كنت برضى بالقَلِيل،وانت ف مشاعرك بخيل
كنت وردة ف وسط شوكك،كنت برك للأمان
بس انت كنت ايه؟
..........
كنت لك شمس النهار،نجمة تهديك للمسار
ايد تطبطب وقت حزنك،قوة وقت الانهيار
بس انت كنت ايه؟
..........
كنت لك ام وحبيبة،شمعة بتنور ظلام
كنت لجروحك طبيبة،كنت زادك للطريق،كنت لك اجدع رفيق
بس انت كنت ايه؟
..........
قولى انت كنت ايه؟..حابة اسمع كنت ايه
قول..ما جايز انا حد ظالم،حد ناكر للجميل
مش هقاطعك يلا قول،انت كنت ليا ايه؟
..........
لو تفكر يوم بطوله،مش هتلقى شئ تقوله
حتى لو هتقول خلاص،فات أوان القول و عدى
..........
مش هتلقى ودن تسمع،مش هتلقى قلب يشفع
قلب كان ساذج عبيط،كان بيتشعبط ف كلمة
تحيى فيه كل اللى مات
بس يا خسارة خلاص،فات أوان القول و عدى
..........
واوعى نفسك يوم تلومك،جرحى نازف؟!!!..مش مهم
هيتكوى بنار الفراق،فيطيب و يلم
مش هقول يا خسارة كان،مهما هيعدى الزمان،مش هحس باى فقد للحنان
..........
لو ضعفنى الشوق ف يوم،مش هجيلك او هحن
هجلد القلب اللى كان لك بيت وحضن،وأوئد الشوق اللى فيه
واكتم الصرخة القوية،واحبس الدمعة الشجية
ضعف تانى ،لأ،مفيش،مش هتلقى غير قوية
...........
يلا امشى وسيبنى أَمشِى،اوعى تتلفت وراك،مش هتلقى غير سراب.
مش هلومك ع اللى فات،همحى كل الذكريات،اصل ايه يفيد الملام،ما اللى فات م العمر فات.
✍ارهاصاتى
#رشا_كمال
0 comments:
إرسال تعليق