مركز أول اسكريبت/هايدي يسري
حذيفة: وانا أقول السماء مضلمة ليه انهاردة اتاري القمر واقف على الأرض
تولين: على طول انت كدة بتضحك عليا بكلمتين صح
حذيفة : انا اقدر يا باشا
تولين: بس ده ميمنعش اني زعلانة وانت اتاخرت
حذيفة: كنت بجهز نفسي
تولين: بتجهز نفسك لية
حذيفة : عايز اقولك حاجة بصراحة
تولين: قول
حذيفة بنفس عميق: انا بحبك
تولين: اه وبعدين
حذيفة : بعدين ايه بقولك بحبك
تولين: ايوة ماهو بعد بحبك دي في تكملة بحبك كأختي كصاحبتي مش هتخرج برا دول
حذيفة : لا انا بحبك بجد عايزك تبقى مراتي زي مانتي صاحبتي واختي وكل حاجة في حياتي
تولين سكتت شوية وهي بصاله شايفة نظرة الحماس في عينه
حذيفة : سكتي لية
تولين: انا مش عارفة اقولك ايه ياحذيفة بس مينفعش
حذيفة بستغراب: مينفعش! هو ايه اللي مينفعش
تولين: انا بعتبرك اخويا اه انت اعز اصحابي بس ده مش معناه اننا نرتبط
حذيفة: بس انا بحبك ده ايه اللي يمنع
تولين: لو ارتبطنا هنخسر صداقتنا وانا مش عايزة كدة
حذيفة : ولية منحافظش عليهم هما الاتنين
تولين: الحب لما بيدخل في أي علاقة لو فشل لقدر الله هنخسر الاتنين حتى اننا نفضل أصحاب هيبقى صعب، للأسف مينفعش
حذيفة : تمام اعتبريني مقولتش حاجة
تولين : متزعلش مني
حذيفة بحزن: ازعل من ايه ده قرارك، انا لازم امشي ورايا مشوار تحبي اوصلك
تولين: لا شكرا هاخد اوبر
حذيفة : على راحتك بردو
تولين لاحظت تغيره في الكلام ده حتى مشي من غير ما يوصلها زي كل مرة بيخرجوا فيها سوا يعرفوا بعض من تلات سنين
بعد شهر في بيت تولين
مايا اختها الاكبر: مالك كدة متغيرة بقالك فترة
تولين: مفيش حاجة عادي
مايا: احكيلي بس
فجأة تولين بدات تعيط جامد واترمت في حضنها
مايا: اهدي بس ياحبيبتي في ايه
تولين بعياط : انا بحبه اوي يامايا بس هو بعد عني مبقناش نتكلم حتى بيعمل سين للمسدج وميردش من اخر مرة اتقابلنا من شهر مش بيكلمني ولا حتى شوفته
مايا: ده حذيفة صح
تولين: ايوة
مايا: واضح في حاجة انتي متعريفهاش
تولين بخضه : حصله حاجة هو كويس
مايا: اهدي هو كويس بس مسافر
تولين باستغراب : مسافر فين ولية
مايا: هينقلوا اسكندرية عند اهل باباه هيعيشو هناك
تولين : ايه طب عرفتي ازاي
مايا: طنط كانت هنا قاعدة مع ماما من كام يوم وحكتلها واحنا فكرناكي عارفة علشان انتو دايما بتكلموا
تولين: انا معرفش حاجة غير منك دلوقتي
مايا : اظن كدة الموضوع انتهى
تولين: بس انا بحبه مش قادرة اكمل من غيره
مايا : لازم تكملي حياتنا مش بتقف على حد
تولين: بس انتي عارفة حذيفة مكنش أي حد
مايا: وايه يعني عادي هتقدري تتغلبي علي احساسك ده وهتكملي من غيره هتفوقي نفسك ان مفيش حد يستاهل انا قولتلك من الاول ان الحب مهلك للقلب واديكي هلكتي قلبك على الفاضي هتكملي وهتقدري انا واثقة فيكي خلاص هو صفحة واتقفلت هتبداي صفحة جديد دلوقتي
تولين: ينفع تسبيني لوحدي شوية
مايا: حاضر ياحبيبتي بس فكري في كلامى كويس
تولين : حاضر
مسكت الفون لقيتني ببعتله رسالة من بين دموعي
تولين : يمكن هتشوف المسدج ومش هترد زي كل مرة ببعتلك فيها بس انا عايزة اقولك حاجة أخيرة ، انا كنت عايزة احافظ على صداقتنا بس انت اتخليت بدري اوي من غير حتى ما تدينا فرصة صعبان عليا اللي احنا وصناله، اه صح عرفت من مايا انكو مسافرين هتنقلوا ربنا يوفقك في حياتك الجاية
بعد خمس سنين
مايا: عبدالله جوزي صاحبه بيدور على عروسة وعبدالله رشحك ليه
تولين: هو احنا هنفضل نفتح الموضوع ده كل شوية ما انا قولتلك مش وقت
مايا: امال امتى هتفضلي قافلة على نفسك هتفضلي متشعلقة بحب حذيفة ياتولين فوقي بقى خلاص نسيكي
تولين: انا مش متشعلقة في حب حد انتي عارفة اني تخطيت المرحلة دي من زمان انتي اللي كل شوية تفتحي الموضوع
مايا: انتي بتضحكي على نفسك ولا عليا انتي كدابة انتي لسة بتحبية لسه بتتمني اليوم اللي هيرجع فيه
تولين: انا مبحبش حد ممكن ترتاحي بقى ومش هتجوز كدة حلو انا نزلة الشغل سلام
مايا: ربنا يهديكي
في عيادة طب الأطفال
تولين: دخلى المريض اللي بعده ياعبير
عبير: حاضر يادكتور
عبير: اتفضل يا أستاذ
في اوضة تولين
شخص: مساء الخير
تولين باصة في اللاب : الصوت ده مش غريب عليا ،بترفع عينيها ناحية الصوت
تولين لنفسها : حذيفة مش ممكن
حذيفة : انتي معايا
تولين بتوتر : اه اه معلش معاك، ماله
حذيفة: أسر بيشتكي من بطنة بقاله يومين ومامته بتشربه اعشاب ودوا اللي قالته جدته بس مش كويس
تولين بتلقائية : ده ابنك
حذيفة: لا ده ابن اختي
تولين : تعالى يا أسر علشان نخفف بطنك
أسر: هتديني حقنة
تولين: لا متخافش هديك بلونة لو سمعت الكلام
أسر: خالو قالي ان الدكتور بيدي حقنة وبتوجع اوي
تولين بضحك: لسة بتخاف من الحقن برضو
حذيفة: لا لا ده كان زمان الله يفضحك يا أسر
ركزت ايه اللي بتعمله ده مينفعش يتكلموا كده
بدأت تكشف على أسر
تولين : متقلقش هيبقى كويس بس ياخد العلاج ده ويجي كمان أسبوعين نطمن عليه
حذيفة: تمام ماشي
تولين: تمام تقدروا تتفضلوا والف سلامة عليه
0 comments:
إرسال تعليق