غربة شتوية...
الغربة مش دايما بالمكان
ولا البعاد لها عنوان
شخص مغترب عن وطنه
سايب أهله وجيرانه وحبايبه
وفيه شخص تاني مغترب عن نفسه
لكنه مع أهله وجيرانه وحبايبه
مع اللي منه بس هو مش منهم
وحييييد بعيد
وسط بشر قلوبهم جلاليد
وهمومه ماشية في الوريد
بيقضي وقته مكتئب وحزين
والرب عالم بالعبيد
قلوبنا عليها شهيد
والشتا بداية المشهد
برده محسسك بالغربة
والمطر مغرق التربة
في ليل حزين طويل
وحشة فضى المكان بتضر
دماغك مليئة بذكريات بتمر
شريط أحداث قدام عينك
ناس كتير كانوا هنا حواليك
ودلوقتي محدش منهم جمبك
مبقاش منهم غير اللي بيزيدك هم فوق همك
حضن كان في البرد دفئ ليك
حب كنت فاكره شاريك
والصحاب صحبتهم ملهاش لزمة
وجودهم مجرد زحمة كما الكراكيب
تبقى محتاجهم فتكتر التلاكيك
والعلاقات في حياتك بتزيد تفكيك
وقلوبنا بقت فتافيت
بقينا بقايا ناس عايشين
كله بيسخر من كله
ويقارن وجعه بوجعك
مع ان لكل ابتلاء حكمة وتدبير
لكن عقولنا عايزة تعديل
وحياتنا دي تمثيل في تمثيل
نضحك ومش عايزين
جوايا حزن دفين
هتزعل من مين ولا على مين
الخلق كما التماثيل
دورهم في وضع ثبات
صامتين كما لو في سبات
وحروبك شغالة جواك
على ذكرى أثرها معاك
وجعها متعب بينهش فيك
وجروحك عميقة،، مبتلمش
تعبت من كلمة نصيب والخلق مبتملش
بكلامهم الدايم خلوا جرحك ينزف
والدم مش بيجف
جفت عيوني عيونك
والدموع خلصت
ومازالت مصر تبكي
والشتا نفسه اعتراف بالبكا
مطره تعاطف م السما،،
بكفاية يا عم الشتا
كفاية غربة ليلك البارد
وشعورى بأن كل شئ حواليا جامد
حتى مشاعري أصبحت باردة
وأوقات بحس بأني جاحدة
أو يمكن، اتعودت الصدمات
وجروحي لازمها ضمادات
لاجل لا يصيبها برد الغربة
رغم اني متدفية
لكن روحي عريانة
حاسة بأني من جوا ساقعانة
غربة شتوية
اتعودت عليها واتأقلمت
ومش هشتكي بأني تعبت..تعبت
#غربة_شتوية
#جهاد_أحمد
0 comments:
إرسال تعليق